【音響入門系列】我要點揀擴音機？

之前奧創仔係IG探討過買喇叭有乜準備同留意，咁下下一步就係揀買擴音機。擴音機一般分「石機」和「膽機」兩種。

今次會先講「石機」 (晶體管擴音機)，日後會再討論「膽機」要跟實奧創仔先唔會甩！

 

買擴音機首先梗係決定資源的分配啦，買合併式擴音機？定係兩部分別前級同後級嘅擴音機？理論上梗係前後級分開買最靚聲。

但實際上如果你係一個入門級玩家 ，你應該用全部預算買入一部合併式擴音機。正常應該唔會將有限錢再分散買前級買後級。加上奧創仔認為除非前後級係同廠套裝，

胡亂配搭入門級嘅前後級聲音可能比同價位合併機仲差！係同一價格下，先買合併式擴音機比較合理。合併機將所有前級後級音量調較放大放係一個機廂入面，精簡易玩。

 

關於擴音機同喇叭配搭

擴音機同喇叭匹配自然係基本。而當你試圖查擴音機嘅規格個陣，可能會發現'100W into 8 ohms'輸出數據。係喇叭同擴音機匹配入面，我地要睇樓擴音機嘅功率輸出；

一般喇叭有建議功率，例如AE品牌嘅喇叭建議功率係150w，咁就唔建議用低於建議功率（150 w）嘅擴音機。因為廠標示一般為最佳平衡效果，假如少於喇叭所示最少嘅w數，有機會會燒喇叭造成危險。

最簡單就係跟返喇叭所示，可以大於建議w數，但一定唔可以少於。音響一向有大食大，愈大推動力喇叭相對愈鬆容、聲音愈穩。

 

 

除咗睇功率仲要睇阻抗(以ohms作單位) 同靈敏度 (以dB作單位)。阻抗係計算喇叭有幾難推動嘅數值，而靈敏度係計算一個輸出下嘅喇叭可以出幾大聲量。

阻抗係喇叭電路入面嘅電阻、電容同電感等…對於交流電（AC）嘅「阻力」。一般喇叭阻抗數標示係4Ω、6Ω、8Ω  etc…阻抗愈低相同功率下對電流需求就愈大，即係愈難推。

喇叭靈敏度愈高係同一部擴音機嘅輸出聲量就愈大。舉個例：同一首歌同一部機，換咗—對靈敏度更高嘅喇叭播放，係唔改變音量控制嘅情況下，聲音會變得更大聲。

制度和測量靈敏度一般係指同喇叭一米距離，以測量1w輸入下嘅聲壓量度輸出 1,000Hz 音頻或者輸出 300Hz 至 3kHz 嘅平均值。大多數喇叭量度得出80dB至90dB聲壓，通常理解愈高db為愈容易推動。

 

聽專家分析，係一個十坪嘅空間聽古典，一般50W×2 以下嘅擴音機已夠用，而低效率喇叭（84dB以下）選擇60-100w石機為宜。高效率喇叭（89dB以上）60w以下嘅石機已經可以勝任，以上所指係一般阻抗為8歐姆。如果喇叭阻抗係4歐姆；正常石機功率需要增加50%以上。當然數據同理論都不及試聽同實經驗為穩。

 

擺放位置

當你搵到喇叭同擴音機嘅配置，下一步自然係考慮點放置擴音機。可能大家會問點解要特別提及擴音機放係邊。其實不論係擴音機定係喇叭，音響對震動係相當敏感所以「避震」就成為一個專門嘅音響課題，假如你幻想係傢私鋪買個靚靚仔仔既電視櫃，再直接將音響裝置放上去….可以，但最好有機會去專業嘅音響架放置器材公司買。對聲學而言，唔同材料嘅音響架對聲音都有不同，一個好的音響架對聲音係有胎換骨嘅改善。所以當你慢慢進入音響世界就會進入墊材同音響架之間嘅新課題。

當然入門選擇最簡單就係將音響放係地上，假如你買嘅係超巨型嘅擴音機，超過咗一般影音櫃或者音響架嘅普通尺寸，除了特制應該也只能放係地下。所以買擴音機前都要考慮你嘅擴音機尺寸同重量，睇下你家中現有嘅影音櫃或者位置能否順利擺放。此外擺放要注意機器有冇留有足夠空間作散熱用途。擴音機運作會產生一定程度熱量，個別有一些擴音機仲熱力驚人，甚至可媲美膽機嘅熱量。(假如你用膽機就更要留有散熱空間！最壞情況可能會驚動消防員！)

 

連接

購買擴音機就必定會考慮連接，一般連接訊源到擴音機有兩種連接方式，一係透過rca線路輸入/輸出連接，二係透過三針嘅XLR平衡線路連接輸入/輸出。RCA係最基礎的連接，所有擴音機都配有RCA輸入同輸出。有啲入門級嘅擴音機就只配置RCA作為單一輸入輸出線路。當中有啲擴音機嘅RCA位會有唱頭輸入(phono input)用作連接黑膠唱盤處理極低電平信號。要留意你嘅訊源係咪只具備RCA輸出。

XLR係另一種常用嘅輸入輸出線路帶有平衡訊號，XLR線路可以抵消器材接收端出現嘅正負極共存噪聲，對於經常需要用長接線傳遞麥克風產生嘅微弱訊號嘅錄音室非常重要，係音響上都有好多人鐘意用XLR作連接，當然冇任何數據或評測係證明XLR比較好聲。有啲擴音機擁有額外低音輸出嘅訊號位置，令用家可以將低音嘅輸出連結外置超低音喇叭作補強低音。不過奧創仔認為外接超低音係AV家庭影院比較常用，不過二聲道影音上應用就要小心，學問非淺。

 

最後要研究自己選擇嘅擴音機有冇升級選項，咩為之升級？並唔係指你再買另過部機器，有啲精於市場學嘅品牌，推出音響產品就有擴充可能，就好比汽車配置嘅升級選項。英國品牌Naim 或者Cyrus等…有好多唔同嘅升級選擇，例如加配升級同廠電源供應等等。假如你唔希望或者有意投入加錢升級增強同廠器材，你就要留意。

基本上擴音機嘅討論已差唔多，今次奧創仔講得比較仔細，相信好多嘢都要消化，太多就長氣啦。留意住奧創仔IG更新，繼續同你更新音響入門系列。